“திமுக கூட்டணி முறிவு?” – தவெக ஆதரவு சாத்தியம்! காங்கிரஸ் தொண்டர்களின் அதிருப்தியை ஒப்புக்கொண்ட கிரீஷ் சோடங்கர்!

“தொண்டர்களின் மனதுக்கு எதிராகத்தான் தமிழ்நாட்டில் திமுக கூட்டணியில் காங்கிரஸ் இணைந்தது” – இந்த முக்கியமான ஒப்புதலை காங்கிரஸ் மேலிட பொறுப்பாளர் கிரீஷ் சோடங்கர் வெளிப்படையாக கூறியுள்ளார். அதே நேரத்தில், விஜயின் தவெக கட்சிக்கு காங்கிரஸ் ஆதரவு தருமா என்ற கேள்விக்கும் அவர் சுவாரஸ்யமான பதில் அளித்துள்ளார்.

தமிழக சட்டசபைத் தேர்தல் முடிவுகள் குறித்து இன்று செய்தியாளர்களை சந்தித்த அவர், கட்சியின் உள்ளக நிலையை நேர்மையாக பகிர்ந்தார்.

அவர் கூறுகையில், “தமிழ்நாட்டில் உள்ள பல உள்ளூர் தலைவர்கள், நிர்வாகிகள்—காங்கிரஸ் தவெகவுடன் கூட்டணி அமைக்க வேண்டும் என்றே வலியுறுத்தினர். ராகுல் காந்தி மற்றும் விஜய் இணைந்து பிரசாரம் செய்திருந்தால், அது மக்களிடையே பெரிய வரவேற்பை பெற்றிருக்கும். தேர்தல் முடிவுகளிலும் அதற்கான தாக்கம் தெளிவாக இருந்திருக்கும். 180 முதல் 190 தொகுதிகள் வரை வெற்றி பெறும் வாய்ப்பு இருந்திருக்கலாம் என்று பலரும் நம்பினர்,” என்றார்.

மேலும் அவர், “இந்தத் தேர்தலில் பெண்களும் இளைஞர்களும் மாற்றத்தை விரும்பி வாக்களித்துள்ளனர். அந்த மாற்ற மனநிலை புதிய கட்சியான தவெகவுக்கு ஆதரவாக மாறியுள்ளது. அதுவே முதல்வரை கூட அவருடைய சொந்த தொகுதியில் தோற்கடிக்க காரணமாகியுள்ளது. தவெக நல்ல முன்னேற்றம் காணும் என்று எங்களுக்கு முன்பே தெரிந்தது,” என்று தெரிவித்தார்.

ஆனால், “‘இந்தியா’ கூட்டணி என்ற கட்டாயம் மற்றும் திமுகவுடன் நீண்டகால உறவு ஆகிய காரணங்களால், மேலிடம் திமுக கூட்டணியைத் தேர்வு செய்தது. இந்த முடிவு பல தொண்டர்களுக்கு பிடிக்கவில்லை. அதனால் சிலர் தவெகவுக்கு சென்றதும் உண்மைதான்,” என்று அவர் நேரடியாக ஒப்புக்கொண்டார்.

இறுதியாக, “இந்த முடிவை நாங்கள் எங்கள் தனிப்பட்ட நலனுக்காக எடுக்கவில்லை. பல அம்சங்களை கவனமாக பரிசீலித்த பிறகே திமுக கூட்டணியைத் தேர்வு செய்தோம்,” என்று விளக்கமளித்தார்.