சுவையான சுலபமான சிக்கன் பிரியாணி | Easy Chicken Biryani Recipe in Tamil

ஒரு அகலமான பாத்திரத்தில் சிக்கனுடன் தயிர், இஞ்சி பூண்டு விழுது, எலுமிச்சை சாறு, மசாலா தூள்கள், உப்பு, பச்சை மிளகாய், புதினா மற்றும் கொத்தமல்லி சேர்த்து நன்றாகக் கலந்து குறைந்தது 2 மணி நேரம் ஊறவைக்கவும். (நேரம் இருந்தால் இரவே ஃப்ரிட்ஜில் ஊறவைக்கலாம்; சிக்கன் மிக மென்மையாக மாறும்).

சமைக்க ஆரம்பிப்பதற்கு முன், பாஸ்மதி அரிசியை மெதுவாகக் கழுவி தண்ணீரில் 30 நிமிடங்கள் ஊறவைக்கவும். (அரிசியை ஊறவைப்பது சாதம் குழையாமல் நீளமாக வர உதவும்).

கனமான பாத்திரத்தில் (Heavy bottomed pan) எண்ணெயைச் சூடாக்கி பட்டை, கிராம்பு, ஏலக்காய், அன்னாசிப்பூ, கல்பாசி, பிரியாணி இலை சேர்த்து வதக்கவும். நறுக்கிய வெங்காயத்தைச் சேர்த்து பொன்னிறமாகும் வரை வதக்கி, தக்காளி சேர்த்து 3-4 நிமிடங்கள் குழைய வதக்கவும். இப்போது ஊறவைத்த சிக்கனை அதன் சாற்றுடன் சேர்த்து, மூடிபோட்டு மிதமான தீயில் 12-15 நிமிடங்கள் வேகவிடவும். (சிக்கனில் இருந்து தண்ணீர் வெளிவரும் என்பதால் தனியாக தண்ணீர் சேர்க்க வேண்டாம்).

சிக்கன் வெந்து கிரேவி கெட்டியானதும், அதில் 3.5 கப் தண்ணீர் சேர்க்கவும். தண்ணீர் நன்றாகக் கொதித்ததும், ஊறவைத்த பாஸ்மதி அரிசியில் உள்ள தண்ணீரை வடித்துவிட்டு அரிசியை மட்டும் சேர்த்து மீண்டும் நன்றாகக் கொதிக்க விடவும்.

அடுப்பு / கேஸ் தவா முறை: தண்ணீர் மற்றும் அரிசி சமமட்டத்திற்கு வந்ததும், அடுப்பில் ஒரு பழைய தோசைக் கல்லை வைத்து, அதன் மேல் பாத்திரத்தை வைத்து மூடி, மேலே ஒரு கனமான எடையை வைத்து குறைந்த தீயில் 15-20 நிமிடங்கள் தம் போடவும். அடுப்பை அணைத்து 10 நிமிடங்கள் கழித்துத் திறக்கவும்.

அவன் (Oven) முறை: அவனை முன்கூட்டியே 200°C (400°F) சூடாக்கி, மூடிய பாத்திரத்தை அவனில் வைத்து 200°C வெப்பநிலையில் 20 நிமிடங்கள் பேக் செய்யவும். வெளியே எடுத்து 10 நிமிடங்கள் அப்படியே வைக்கவும்.