விஜய்க்கு எதிராக நடிகர் மகளை களமிறக்க திமுக திட்டம்? அரசியல் சூடு பிடிக்கும் போட்டி!
தமிழக வெற்றிக் கழகத்தின் தலைவர் விஜய், வரும் சட்டமன்ற தேர்தலை முன்னிட்டு அரசியல் களத்தில் தீவிரமாக செயல்பட்டு வருகிறார். திரையுலகத்தை விட்டு அரசியலுக்கு வந்துள்ள அவரைச் சுற்றி இந்த தேர்தலில் பெரும் எதிர்பார்ப்பு உருவாகியுள்ளது. ஆட்சியை பிடிப்பது உறுதி அல்ல என்றாலும், தேர்தல் முடிவை தீர்மானிக்கும் முக்கிய சக்தியாக விஜய்யின் கட்சி உருவெடுக்கலாம் என்று அரசியல் வட்டாரங்களில் பேசப்படுகிறது.
இந்நிலையில், விஜய் எந்த தொகுதியில் போட்டியிடப் போகிறார் என்பது அவரது ஆதரவாளர்கள் மற்றும் ரசிகர்களிடையே அதிக ஆர்வத்தை ஏற்படுத்தியுள்ளது. ஆரம்பத்தில் தென் மாவட்டங்கள் அல்லது திருச்சி பகுதிகளில் அவர் களம் இறங்குவார் என எதிர்பார்க்கப்பட்டது. ஆனால், கடந்த சில நாட்களாக அவர் சென்னை பெரம்பூர் தொகுதியை தேர்வு செய்யக்கூடும் என்ற தகவல் வலுப்பெற்று வருகிறது.
அதற்கான சுட்டிக்காட்டாக, பெரம்பூரில் ஏசி வசதியுடன் கட்சி அலுவலகம் தயார் செய்யப்படுவதாக கூறப்படுகிறது. இதனால், விஜய் அங்கேயே போட்டியிடலாம் என்ற கணிப்பு மேலும் உறுதியாகியுள்ளது.
இந்த நிலைமையில், விஜய்க்கு எதிராக வலுவான வேட்பாளரை நிறுத்த திமுக மற்றும் அதிமுக இரு கட்சிகளும் திட்டமிட்டு வருகின்றன. குறிப்பாக, திமுக சார்பில் நடிகர் சத்யராஜின் மகள் திவ்யா சத்யராஜை களமிறக்கலாம் என்ற தகவல் சமூக வலைத்தளங்களில் பரவி வருகிறது. இந்த தகவல் அதிகாரப்பூர்வமாக உறுதி செய்யப்படவில்லை என்றாலும், விஜய்யை எதிர்கொள்ள ஒரு பலமான வேட்பாளர் நிச்சயம் நிறுத்தப்படுவார் எனக் கூறப்படுகிறது.
பெரம்பூர் தொகுதியின் தேர்தல் வரலாற்றைப் பார்க்கும்போது, 1967க்கு பிறகு திமுக 9 முறை வெற்றி பெற்றுள்ளது. அதேசமயம், அதிமுக 1991 மற்றும் 2016 ஆகிய ஆண்டுகளில் மட்டும் வெற்றி பெற்றுள்ளது. 2021 சட்டமன்ற தேர்தலில் திமுக வேட்பாளர் ஆர்.டி. சேகர் 1,05,267 வாக்குகள் பெற்று வெற்றி பெற்றார். அவருக்கு எதிராக போட்டியிட்ட அதிமுக வேட்பாளர் என்.ஆர். தனபால் 50,291 வாக்குகள் மட்டுமே பெற்று, 54,976 வாக்கு வித்தியாசத்தில் தோல்வியடைந்தார்.
இதனால், பெரம்பூர் தொகுதி இந்த முறை மிகுந்த கவனத்தை ஈர்க்கும் முக்கிய அரசியல் அரங்காக மாறியுள்ளது. விஜய் இங்கு போட்டியிடுவாரா, அவருக்கு எதிராக யார் களம் இறங்குவார் என்ற கேள்விகள் தொடர்ந்து பரபரப்பை ஏற்படுத்தி வருகின்றன.
