தாய்மாமன் தங்க மோதிர திட்டம், முதல்வர் விஜய் தலைமையிலான தமிழக அரசின் புதிய நலத்திட்டங்களில் ஒன்றாக கவனம் பெற்றுள்ளது. அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் இந்தத் திட்டத்தை செப்டம்பர் 28ஆம் தேதி முதலமைச்சர் விஜய் தொடங்கி வைக்க உள்ளதாக தமிழக அரசு அறிவித்துள்ளது.
தமிழர் பண்பாட்டில் தாய்மாமன் மேற்கொள்ளும் சீர்மரபை பிரதிபலிக்கும் வகையில் இந்தத் திட்டம் கொண்டு வரப்பட்டுள்ளதாக அரசு தெரிவித்துள்ளது. இதற்கான அரசாணை கடந்த ஜூன் 23ஆம் தேதி வெளியிடப்பட்ட நிலையில், ஜூன் 22ஆம் தேதி முதல் அரசு மருத்துவமனைகளில் பிறந்த குழந்தைகளும் திட்டத்தின் கீழ் பயன்பெற உள்ளனர்.
தாய்மாமன் தங்க மோதிர திட்டம் – யாருக்குக் கிடைக்கும்?
இந்தத் திட்டத்தின் கீழ் அரசு மருத்துவமனைகளில் பிறக்கும் குழந்தைகளுக்கு தலா ஒரு கிராம் எடையுள்ள தங்க மோதிரம் வழங்கப்படும். மோதிரங்களுக்கு தனித்துவமான வரிசை எண்ணும், சேதப்படுத்த முடியாத பாதுகாப்புப் பெட்டகமும் வழங்கப்பட உள்ளதாக தமிழக அரசு தெரிவித்துள்ளது.
தமிழ்நாட்டில் நிரந்தரமாக வசிக்கும் தாய்மார்கள் இந்தத் திட்டத்தின் கீழ் பயன்பெறலாம். இதற்காக PICME-யில் பதிவு செய்யப்பட்டு RCH அடையாள எண் (RCHID) பெற்றிருக்க வேண்டும் என தெரிவிக்கப்பட்டுள்ளது.
1.28 லட்சம் தங்க மோதிரங்கள் தயார்
தாய்மாமன் தங்க மோதிர திட்டத்திற்காக முதல் கட்டமாக 1 லட்சத்து 28 ஆயிரம் தங்க மோதிரங்கள் கொள்முதல் செய்யப்பட்டுள்ளதாக அரசு தெரிவித்துள்ளது.
செப்டம்பர் 28ஆம் தேதி திட்டம் தொடங்கப்பட்ட பின்னர், அரசு மருத்துவமனைகளில் பிறந்து வீடு திரும்பும் குழந்தைகளுக்கு மோதிரம் வழங்க ஏற்பாடுகள் செய்யப்பட்டுள்ளன. ஏற்கெனவே ஜூன் 22 முதல் திட்டம் தொடங்கும் நாள் வரை பிறந்த குழந்தைகளுக்கும் மோதிரம் வழங்கப்பட உள்ளது.
107 மையங்களில் விநியோகம்
முந்தைய காலகட்டத்தில் பிறந்த குழந்தைகளுக்கு மோதிரங்களை வழங்குவதற்காக தமிழகம் முழுவதும் 107 மையங்கள் (Hubs) ஏற்படுத்தப்பட்டுள்ளன. இந்த மையங்களில் தினமும் சுமார் 100 குழந்தைகள் வீதம் மோதிரம் வழங்க ஏற்பாடு செய்யப்பட்டுள்ளதாக தமிழக அரசு தெரிவித்துள்ளது.
இதனால் திட்டம் தொடங்கும் நாளில் மட்டும் பயன்பெறும் வகையில் அல்லாமல், ஜூன் 22 முதல் பிறந்த தகுதியான குழந்தைகளுக்கும் படிப்படியாக மோதிரம் வழங்கப்பட உள்ளது.
செங்கல்பட்டு, திருப்பூர் மாவட்டங்களுக்கு விலக்கு
இதனிடையே, செங்கல்பட்டு மற்றும் திருப்பூர் மாவட்டங்களைத் தவிர மற்ற மாவட்டங்களில் செப்டம்பர் 28ஆம் தேதி முதல் திட்டம் நடைமுறைக்கு வர உள்ளதாக தகவல் வெளியாகியுள்ளது.
இந்த இரண்டு மாவட்டங்களில் உள்ள சில சட்டப்பேரவைத் தொகுதிகளில் இடைத்தேர்தல் நடைபெறுவதால், அங்கு திட்டம் பின்னர் அமல்படுத்தப்படும் என தெரிவிக்கப்பட்டுள்ளது.
முன்பு செப்.15 என அறிவிப்பு
தாய்மாமன் தங்க மோதிர திட்டம் முதலில் செப்டம்பர் 15ஆம் தேதி தொடங்கப்படும் என தமிழக அரசு அறிவித்திருந்தது. பின்னர் திட்டத்தின் தொடக்க தேதி மாற்றப்பட்டு, தற்போது செப்டம்பர் 28ஆம் தேதி தொடங்கும் என அதிகாரப்பூர்வமாக அறிவிக்கப்பட்டுள்ளது.
இதற்கிடையில், செப்டம்பர் 18ஆம் தேதி தலைமைச் செயலகத்தில் முதல்வர் விஜய் தலைமையில் திட்டத்தைத் தொடங்குவது மற்றும் செயல்படுத்துவது தொடர்பான ஆய்வுக் கூட்டம் நடைபெற்றது. அதன்பின்னரே புதிய தொடக்க தேதி குறித்த அறிவிப்பு வெளியாகியுள்ளது.
தமிழக வெற்றிக் கழகத்தின் தேர்தல் வாக்குறுதியிலிருந்து திட்டமாக…
தேர்தலுக்கு முன்பாக தமிழக வெற்றிக் கழகம் சார்பில் முன்வைக்கப்பட்ட வாக்குறுதிகளில் தாய் மாமன் தங்க மோதிர திட்டமும் இடம்பெற்றதாக இந்தத் திட்டம் குறித்து பரவலாக பேசப்பட்டு வருகிறது.
தற்போது அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் வகையில் இது செயல்படுத்தப்பட உள்ளது. திட்டத்தின் நடைமுறை, பயனாளிகள் மற்றும் விநியோக ஏற்பாடுகள் குறித்து தமிழக அரசு விரிவான தகவல்களை வெளியிட்டுள்ளது.
செப்.28ல் என்ன நடக்கிறது?
வரும் செப்டம்பர் 28ஆம் தேதி முதல்வர் விஜய் அதிகாரப்பூர்வமாக தாய்மாமன் தங்க மோதிர திட்டத்தை தொடங்கி வைக்க உள்ளார். அதன் பின்னர் அரசு மருத்துவமனைகளில் பிறக்கும் தகுதியான குழந்தைகளுக்கு மருத்துவமனையிலிருந்து வீடு திரும்பும்போது மோதிரம் வழங்கும் நடைமுறை அமலுக்கு வரும்.
தாய்-சேய் நலனை வலுப்படுத்துவதுடன், அரசு மருத்துவ சேவைகள் மீதான நம்பிக்கையை அதிகரிப்பதும், தமிழர் பாரம்பரியத்தில் இடம்பெறும் தாய்மாமன் சீர்மரபை பிரதிபலிப்பதும் திட்டத்தின் நோக்கமாக அரசு தெரிவித்துள்ளது.
