2025-ல் ரசிகர்களை ஏமாற்றிய டாப் ஹீரோக்கள் யார்?

ஒவ்வொரு ஆண்டின் முடிவிலும் தமிழ் சினிமா ரசிகர்களிடம் ஒரு பெரிய கேள்வி எழும். இந்த வருடம் யார் ஜெயித்தார்கள்? யார் தடுமாறினார்கள்? பாக்ஸ் ஆபிஸ் வசூல், விமர்சகர்களின் கருத்து, ரசிகர்களின் எதிர்வினை – எல்லாவற்றையும் வைத்து அந்த ஆண்டின் சினிமா போக்கு மதிப்பிடப்படுகிறது.

2025-ம் ஆண்டும் அதற்கு விதிவிலக்கல்ல, இந்த வருடம், மிகப்பெரிய ஹீரோக்களின் படங்கள் வரிசையாக வெளியானது. சில படங்கள் எதிர்பார்ப்பை மீறி வெற்றி பெற்றன. அதே நேரத்தில், “இந்த படம் கண்டிப்பா ஹிட்” என்று நம்பப்பட்ட சில படங்கள் ரசிகர்களுக்கு பெரும் ஏமாற்றமாக முடிந்தன. அதில் முக்கியமான விஷயம் – தோல்வியை சந்தித்த பல படங்கள் பெரிய ஹீரோக்களின் படங்களாக இருந்தது.

அப்படிப் பார்த்தால், 2025-ல் ரசிகர்களை ஏமாற்றிய டாப் ஹீரோக்கள் யார்? காரணம் என்ன? இங்கே தெளிவாகப் பார்ப்போம்.

அஜித் – விடாமுயற்சி, எதிர்பார்ப்பு அதிகம், முடிவு கசப்பு

இந்த லிஸ்டில் அஜித் பெயரைப் பார்த்ததும் பலருக்கு ஆச்சர்யமாக இருக்கும்.
2025 பிப்ரவரியில் வெளியான ‘விடாமுயற்சி’ படம், அஜித்தின் கரியரில் பெரிய ஏமாற்றமாக அமைந்தது. மகிழ் திருமேனி இயக்கத்தில், பெரிய பட்ஜெட்டில் உருவான இந்த படம், வெளியான உடனே நெகட்டிவ் விமர்சனங்களை சந்தித்தது. கதை, திரைக்கதை இரண்டும் ரசிகர்களை கவரவில்லை. அதன் தாக்கம் நேரடியாக பாக்ஸ் ஆபிஸில் தெரிந்தது. ஆனால் அஜித் அங்கேயே நின்றுவிடவில்லை. ‘குட் பேட் அக்லி’ மூலம் அதிரடி கம்-பேக் கொடுத்து, “AK இன்னும் ஃபார்ம்ல தான்” என்பதை நிரூபித்தார்.

விக்ரம் – வீர தீர சூரன், எதிர்பார்ப்பு சிக்கிய இடம்

ஒரு காலத்தில் ரசிகர்களை ஏமாற்றாத ஹீரோ என்றால் அது விக்ரம். ஆனால் கடந்த சில ஆண்டுகளாக அவரது படங்கள் ரசிகர்களின் எதிர்பார்ப்புக்கு முழுமையாக பொருந்தவில்லை.

2025-ல் வெளியான ‘வீர தீர சூரன் – பாகம் 2’ பெரிய வெற்றி பெறும் என எதிர்பார்க்கப்பட்டது. ஆனால் ரிலீஸ் நாளிலேயே ஓடிடி உரிமை பிரச்சனைகள் உருவாகி, படம் வசூலில் பாதிப்பை சந்தித்தது. இதனால் நல்ல படம் என்ற பெயர் இருந்தாலும், பாக்ஸ் ஆபிஸில் அது பிரதிபலிக்கவில்லை.

மேலும், இயக்குநர் பிரேம் குமாருடன் விக்ரம் இணைவார் என்ற எதிர்பார்ப்பு ரசிகர்களிடம் இருந்தது. ஆனால் அந்த ப்ராஜெக்ட் கைவிடப்பட்டதால், விக்ரம் ரசிகர்களுக்கு அது இன்னொரு ஏமாற்றமாக அமைந்தது.

சூர்யா – ‘ரெட்ரோ’ கொடுக்காத கம்-பேக்

மே மாதம், கார்த்திக் சுப்புராஜ் இயக்கத்தில் வெளியான ‘ரெட்ரோ’, சூர்யாவுக்கு ஒரு மாஸ் கம்-பேக் படமாக இருக்கும் என எதிர்பார்க்கப்பட்டது.
ஆரம்ப விமர்சனங்களில் கலைநேர்த்தி, ஒளிப்பதிவு போன்ற விஷயங்கள் பாராட்டைப் பெற்றன.

ஆனால் கதையும் உணர்ச்சி இணைப்பும் சூர்யா ரசிகர்களுக்கு போதுமானதாக இல்லை.
‘கங்குவா’ படத்துக்குப் பிறகு சூர்யாவை மீட்டெடுக்கும் படமாக இது அமையவில்லை என்பதே ரசிகர்களின் பொதுக் கருத்து.

தனுஷ் – குபேரா, பான் இந்தியா, ஆனால் தமிழ் ரசிகர்கள்?

தமிழ், தெலுங்கு, இந்தி என பான் இந்திய நட்சத்திரமாக வளர்ந்துள்ள தனுஷ், 2025-ல் கலவையான முடிவுகளை சந்தித்தார்.
‘குபேரா’ தெலுங்கில் நல்ல வரவேற்பைப் பெற்றாலும், தமிழ் ரசிகர்களின் எதிர்பார்ப்பை பூர்த்தி செய்யவில்லை.

மேலும், தனுஷ் இயக்கத்தில் வெளியான ‘நிலவுக்கு என் மேல் என்னடி கோபம்’ திரைப்படம் ஆண்டின் தொடக்கத்திலேயே தோல்வியை தழுவியது. இயக்குநராக தனுஷிடம் இன்னும் அதிக எதிர்பார்ப்பு இருப்பதை இந்த தோல்வி காட்டியது.

கமல் – சிம்பு : தக் லைஃப், 2025-ன் பாக்ஸ் ஆபிஸ் பாம்

2025-ன் பாக்ஸ் ஆபிஸ் பாம் என்றால் பலரும் ஒரே குரலில் சொல்வது – ‘தக் லைஃப்’.
படத்தின் ப்ரமோஷனுக்காக படக்குழு பல நகரங்களுக்கு சென்று தீவிரமாக வேலை செய்தது. ஆனால் படம் வெளியானதும், ரசிகர்களுக்கு அது பெரிய ஏமாற்றமாக முடிந்தது.

விமர்சகர்களிடமிருந்தே கடுமையான விமர்சனங்கள் வந்தன. இதில் நடித்த கமல் ஹாசன் – சிம்பு இருவருமே தங்கள் ரசிகர்களை ஏமாற்றிவிட்டார்கள் என்ற கருத்து பரவலாக பேசப்பட்டது.

வெற்றி பட்டியலில் ரஜினி & அஜித்

எல்லாமே தோல்விதான் என்றில்லை. லோகேஷ் கனகராஜ் இயக்கத்தில் ரஜினி நடித்த ‘கூலி’, விமர்சன ரீதியாக கலவையான கருத்துகளை பெற்றாலும், வசூலில் சாதனை படைத்தது. “தமிழ் சினிமாவுக்கு பணத்தை வாரி இறைத்த படம்” என்றால் அது கூலி தான்.

அதேபோல், அஜித்தின் ‘குட் பேட் அக்லி’ படம் ரசிகர்களுக்காகவே உருவாக்கப்பட்ட ஒரு கொண்டாட்டமாக மாறியது. அஜித் ரசிகர்களுக்கு இது 2025-ன் பெரிய திருப்தி.

இனி வரப்போகும் பெரிய எதிர்பார்ப்புகள்

2025 முடிவில் இருந்து 2026 தொடக்கத்துக்குள், ரசிகர்களின் கவனம் சில முக்கிய படங்கள் மீது குவிந்துள்ளது.

ஜனநாயகன் – ஜனவரி 9

பராசக்தி – ஜனவரி 10

ஜெயிலர் 2 – ஆகஸ்ட் 12 (எதிர்பார்ப்பு)

இந்தியன் 3, பராசக்தி – பெரிய ஹைப்

இந்த படங்கள் தான் அடுத்த கட்டத்தில் தமிழ் சினிமாவின் திசையை தீர்மானிக்கப் போகின்றன. 2025 என்பது எதிர்பார்ப்பும் ஏமாற்றமும் கலந்து வந்த ஒரு வருடம். பெரிய ஹீரோ என்பதால் வெற்றி உறுதி இல்லை என்பதையும், ரசிகர்கள் நல்ல கதையைத்தான் தேடுகிறார்கள் என்பதையும் இந்த ஆண்டு மீண்டும் நிரூபித்துவிட்டது.