நீலகிரி மாவட்டத்தில் பெய்து வரும் தொடர் கனமழையால் உதகை உள்ளிட்ட பகுதிகளில் நிலச்சரிவுகள் ஏற்பட்டு, அரசு பேருந்து ஓட்டுநர் உயிரிழந்த சம்பவம் அதிர்ச்சியை ஏற்படுத்தியுள்ளது. மாவட்டத்திற்கு ரெட் அலர்ட் எச்சரிக்கை விடுக்கப்பட்டுள்ள நிலையில், நீலகிரி கனமழை பாதிப்புகளைத் தொடர்ந்து அனைத்து சுற்றுலா தலங்களையும் மறு அறிவிப்பு வரும் வரை மூட மாவட்ட நிர்வாகம் உத்தரவிட்டுள்ளது. மீட்பு மற்றும் முன்னெச்சரிக்கை நடவடிக்கைகளுக்காக தேசிய பேரிடர் மீட்புப் படையின் (NDRF) இரண்டு குழுக்கள் ஊட்டிக்கு விரைந்துள்ளன.
நீலகிரி கனமழை: 3 இடங்களில் நிலச்சரிவு; பேருந்து ஓட்டுநர் உயிரிழப்பு
நீலகிரி மாவட்டம் உதகை மற்றும் சுற்றுவட்டாரப் பகுதிகளில் நேற்றிரவு முழுவதும் கனமழை பெய்தது. இதில் அதிகபட்சமாக பர்லியாறு பகுதியில் 25 சென்டி மீட்டர் மழை பதிவானதாகத் தெரிவிக்கப்பட்டுள்ளது.
தொடர் மழையின் காரணமாக உதகை – மேட்டுப்பாளையம் சாலையில் மூன்று இடங்களில் நிலச்சரிவு ஏற்பட்டது. இதில் அரசு பேருந்து ஒன்று சிக்கியதில், இடிபாடுகளுக்குள் சிக்கிய ஓட்டுநர் உயிரிழந்தார். படுகாயமடைந்த நடத்துநர் மருத்துவமனையில் அனுமதிக்கப்பட்டுள்ளார்.
உதகை மண்சரிவு: போக்குவரத்து பாதிப்பு; மலை ரயில் சேவையும் முடக்கம்
பர்லியாறு பகுதியில் ஏற்பட்ட நிலச்சரிவால் பல இடங்களில் மரங்கள் முறிந்து விழுந்தன. இதனால் மலைப்பாதையில் போக்குவரத்து பாதிக்கப்பட்டதுடன், உதகை மலை ரயில் சேவையும் பாதிப்புக்குள்ளானது.
சாலைகளில் குவிந்துள்ள மண் மற்றும் பாறைகளை ஜேசிபி இயந்திரங்களின் உதவியுடன் அகற்றும் பணிகள் நடைபெற்று வருகின்றன. குன்னூர் – மேட்டுப்பாளையம் மலைப்பாதையில் ஏற்பட்டுள்ள பாதிப்புகளை மாவட்ட ஆட்சியர் லட்சுமி பவ்யா தண்ணீரு நேரில் ஆய்வு செய்தார்.
தடுப்புச்சுவர் இடிந்து கார்கள் சேதம்: நூலிழையில் உயிர் தப்பிய காவலாளி
உதகை தீட்டுக்கல் பகுதியில் தடுப்புச்சுவர் இடிந்து விழுந்ததில் இரண்டு கார்கள் மற்றும் ஆறு இருசக்கர வாகனங்கள் சேதமடைந்தன. அப்போது அங்கிருந்த காவலாளி ஒருவர் நூலிழையில் உயிர் தப்பிய சம்பவம் தொடர்பான சிசிடிவி காட்சிகளும் வெளியாகியுள்ளன.
இதற்கிடையே, கோத்தகிரி கொணவக்கரை சாலையில் ராட்சத மரம் ஒன்று விழுந்ததால் போக்குவரத்து பாதிக்கப்பட்டது. மரத்தை வெட்டி அகற்றும் பணியில் தீயணைப்புத் துறையினர் ஈடுபட்டனர்.
கோத்தகிரியில் வெள்ளப்பெருக்கு: வீட்டுக்கு ஆபத்து
கோத்தகிரி சுற்றுவட்டாரப் பகுதிகளில் பெய்த கனமழையால் கொட்டக்கம்பை ஆற்றில் கடும் வெள்ளப்பெருக்கு ஏற்பட்டுள்ளது. ஆற்றோரப் பகுதியில் மண் சரிவு ஏற்பட்டுள்ளதால் அங்குள்ள வீடு ஒன்று இடிந்து விழும் அபாயம் உருவாகியுள்ளது.
தொடர் மழையால் மலைப்பகுதிகளில் மண் சரிவு, மரங்கள் விழுதல் மற்றும் சாலைப் போக்குவரத்து பாதிப்பு போன்ற அபாயங்கள் அதிகரித்துள்ளன. இதனால் பொதுமக்கள் பாதுகாப்பாக இருக்க வேண்டிய அவசியம் ஏற்பட்டுள்ளது.
சுற்றுலா தலங்கள் மூடல்: 3 நாட்களுக்கு ஊட்டிக்கு வர வேண்டாம்!
நீலகிரி மாவட்டத்திற்கு ரெட் அலர்ட் எச்சரிக்கை விடுக்கப்பட்டுள்ள நிலையில், மாவட்டத்தில் உள்ள அனைத்து சுற்றுலா தலங்களையும் மறு அறிவிப்பு வரும் வரை மூட மாவட்ட ஆட்சியர் உத்தரவிட்டுள்ளார்.
மேலும், அடுத்த மூன்று நாட்களுக்கு சுற்றுலாப் பயணிகள் உதகைக்கு வருவதைத் தவிர்க்க வேண்டும் என்றும் அறிவுறுத்தப்பட்டுள்ளது. கனமழையால் சாலைகளில் மரங்கள் விழுந்தும், பல இடங்களில் நிலச்சரிவுகள் ஏற்பட்டும் போக்குவரத்துக்கு இடையூறு ஏற்பட்டுள்ளதால், பொதுமக்கள் அத்தியாவசியத் தேவையின்றி வெளியே வர வேண்டாம் என மாவட்ட நிர்வாகம் கேட்டுக்கொண்டுள்ளது.
ஊட்டிக்கு விரையும் தேசிய பேரிடர் மீட்புப் படை
நீலகிரி மாவட்டத்தில் தொடர்ந்து பெய்து வரும் கனமழையால் மீட்பு மற்றும் முன்னெச்சரிக்கை நடவடிக்கைகளைத் தீவிரப்படுத்த தேசிய பேரிடர் மீட்புப் படையின் இரண்டு குழுக்கள் ஊட்டிக்கு அனுப்பி வைக்கப்பட்டுள்ளன.
தமிழ்நாடு பேரிடர் மேலாண்மைத் துறையின் கோரிக்கையைத் தொடர்ந்து, அரக்கோணத்தில் உள்ள NDRF-இன் 4-வது பட்டாலியனிலிருந்து இந்தக் குழுக்கள் அனுப்பப்பட்டுள்ளன. மழை பாதிப்புகள் அதிகரிக்கும் சூழலில், மீட்புப் பணிகளையும் அவசரகால நடவடிக்கைகளையும் மேற்கொள்ள இந்தக் குழுக்கள் தயாராக இருக்கும்.
நீலகிரியில் சுற்றுலாப் பயணிகள் கவனத்திற்கு!
நீலகிரி மாவட்டத்தில் கனமழை, நிலச்சரிவு மற்றும் வெள்ளப்பெருக்கு காரணமாகப் பல்வேறு பகுதிகளில் இயல்பு வாழ்க்கை பாதிக்கப்பட்டுள்ளது. சுற்றுலா தலங்கள் மூடப்பட்டுள்ளதால், பயணத்தைத் திட்டமிட்டவர்கள் மாவட்ட நிர்வாகத்தின் அதிகாரப்பூர்வ அறிவிப்புகளைப் பின்பற்றி செயல்படுவது அவசியம்.
மழை பாதிப்புகள் சீராகும் வரை மலைப்பாதைகளில் தேவையற்ற பயணங்களைத் தவிர்த்து, பாதுகாப்புக்கு முன்னுரிமை அளிக்க வேண்டும்.
